Нийслэлийн иргэн хүн татвар төлөх үүрэгтэй ч гаргаж буй аливаа шийдвэр нь хэтэрхий нэг талыг барьсан хүч хэрэглэсэн, хүний эрхийн мэдрэмжгүй байгаад иргэд бухимдаж байна. Нийслэлийн удирдах албан тушаалтнуудын харилцаа хандлага танигдахааргүй болтлоо өөрчлөгдөж байгааг хэвлэлээр гарч буй мэдээллээс харж болно. Улаанбаатар хотын авто тээврийн хэрэгслийн албан татварын нэмэгдлийг цуцлах талаар гаргасан нийтийн өргөдлийг судлан үзэж, санал, дүгнэлт гаргах үүрэг бүхий ажлын хэсгийн санал дүгнэлтийн үеэр хотын авто замын хөгжлийн газрын удирдлагуудын УИХ-ын ажлын хэсэг дээр танилцуулж байгаа мэдээллээс харж болно. Татвар нэмэх асуудлыг хэдэн хүнээс санал асуулга авсан бэ гэхэд хоёрхон хүнийг хэлж байгаа нь иргэдийг маш ихээр доромжилж байна гэж үзэж байна. Мөн өнөөдрийн татварыг 4 дахин нэмэхээр байсныг иргэдийн саналаар 3 дахин нэмэхээр боллоо гэсэн нь иргэдийг үнэхээр илэрхий дорд үзэж байгаа нь харагдаж байна. Авто замын өнөөдрийн түгжрэлийн шалтгаан нь 30 жил нийслэлийг удирдахдаа огт төлөвлөлтгүйгээр газар зарж, битүү бетон ширэнгэ үүсгэхэд зөвшөөрөл өгч, ерөнхий төлөвлөлт баталсан дарга нар, ерөнхий архитекторуудын авлигатай холбоотой. Гэтэл эцсийн дүнд иргэдийг машин их уналаа гэж буруутгаж байгаа нь төрийн нэрийн өмнөөс иргэдэд үйлчлэх үүрэг хүлээсэн нийслэлийн удирдлагууд Иргэдийнхээ дуу хоолойг сонсохоо больсон нь харамсалтай.

Бусадтай хуваалцах